Stammtisch Dünnbrettbohrer die Fasnetsgruppe aus Donzdorf

Historie des Stammtisch Dünnbrettbohrer aus der Sicht eines Gründungsmitgliedes, schwäbischer Herkunft Nochdem sich die TG Donzdorf drzua entschlossa hod koin Waga mehr fer dr Fasnetsomzug zom baua, hend sich aus dr Nochfolgegrubbe "Sportler aus Donzdorf " a baar Leid drzua entschlossa en Zukunfd emmr beim Fasnetsomzug mitzommacha ond wiedr Waga zom baua. A Nama isch dann au gfonda worra ond dia hend sich no Schdammdisch Dünnbrettbohrer gnennd. Sie hend dann au no beschlossa jeden erschda Samschdich em Monad, en dr Trauba en Donzdorf, an Schdammdisch abzomhalda. A hischdorisches Ereignis war no dr Fasnetsomzug neitzehhonderdsiebnaachzg weil do send se no zom erschda mol ondr neiem Nama midgloffa. Bis heid isch ois oferändet ond zwar jedr, der Luschd drzua hod, ka bei de Dünnbrettbohrer midmacha au wenn r ed aus Donzdorf isch. Ond weil ed s ganz Johr Fanset isch, hod ma beschlossa emmr em Sommr  "s Große Feschd" zom macha, wo jedr der Luschd, ond schomml beim Omzug midgmachd hod, komma, ond sich dr Ranza mid Essa ond Drenga follschlaga ka. Do wird no grilld, dia gschbendade Salat gessa ond ganz wichdig guggd das ma ed dehydriert, also quasi gnuag zom Drenga kriagd Die erschde Waga send no fon Hand zoga worra, wobei ma sich den Karra en dr Moschde ausgliaha hod. Baud hod ma dia Kärra en dr Dobblgarasch fon Hirner's en dr Bergschdroos. Weidrganga isch no mid selbr zammagschwoisde Gschdell dia doch no a bissle wacklig ond ed so arg zuaferlässig ausgseha hend. Abr wenn ma jedzd scho an "Waga" kehd hod no brauchd ma au a gscheids Zugfahrzeug drzua. Des hod ma sich no en Böhmakirch beim Kosnopfl leiha kenna. S Problem war bloos ma hod den Bulldog erschd am Samschdich for am Omzug griagd ond noch am Omzug hod r glei wiedr abbaud werra missa, weil r glei wiedr noch Böhmakirch hod missa zom Schneeschiaba. Fer an greesra Waga brauchd ma au mei Madrial ond Farb. Drom hod ma sich dann drzua endschlossa bei dr Schdroosafasnet am Fasnetsdienschdag mit zwoi andre Grubba zam Würschdla ond Gedrenge zom ferkaufa. Des isch bis heid so blieba ond isch bloos ondrbrocha worra, wo sich dia Hisdorische Grubba drzua endschlossa hend, dr Fasnedsdienschdag en Oigareschie zom macha. Seid d Schdroosafasnet wiedr fom Kulturring Donzdorf organisierd wird isch dui Bewirdung alloi en de Hend fom Schdammdisch Dünnbrettbohrer weil sich neamad anders fendad. D negschda grosa Ferenderung war no a Oiachshengr den ma fon ma Bauer aus Reichabach, odr Neimodisch Donzdorf 2, ausleiha konnd. Ausrdem isch, zom erschdamol, dr Waga nemme en dr Bergschdroos sondern onda beim Mecedes Müller, en dr Waschhall, zammabaud worra. Im Johr druff hod ma no zom erschda mol en ra Halle baua kenna. Beim Eschdrich Wilhelm konnd ma dr Waga, nochdem ma uffgrohmd hod, neischdella ond des scho drei Wocha for am Omzug! S war zwar sau kald abr ma hod ed elles noch am baua wiedr ferroma missa. D Schdeigerung war no das ma dr Bulldog beim Elektro Straub en ra ghoizda Hall hod ferkleida kenna. Oimol war a Ondrbrechung ond ma hod beim Bauzanagel onda dr Dino baud. Seid 2003  bauad ma jedzd en dr Hall fom Alfi Rink dui mr os seid 2004 mid de Feschtkappa doilad. Ab 2006 hod ma no an neia Bulldog, den fom Dietmar, zom ziaha fom Waga griagd. Der war au bloos bis 2008 em Eisadz no hod ma, wegga auflaga fom Landratsamt, scho wiedr a nuis Zugfahrzeig brauchd, des hod mo no zwoidausadzeha beim Rolf gfonda. Nomml a Meilaschdoi fer dr erschde Forschdand, der des ibrigens seid Afang a machd (sehr beachdlich), war als em Johr zwoidausadachd s erschde mol ibr honderd Leid henderm Waga hergloffa send.